فانله ابو تريكه فى وش الحكومه

فانله ابو تريكه فى وش الحكومه

( ان تصدير الغاز المصرى لاسرائيل هو القهر بعينه للشعب المصرى ولباقى شعوب العالم الاسلامى وهذا القهر مرفوض لانه يؤدى الى الانفجار)

دى كانت كلمات الداعيه الاسلاميه الدكتوره ( عبله الكحلاوى) عميده كليه الدراسات

الاسلاميه سابقا والتى اضافت ( لا يمكن لاى انسان صاحب عقل ولديه كرامه ان يوافق او حتى يفكر فى تصدير الغاز المصرى للاسرائلين الذين يقتلون ويشردون اشقائنا يوميا )

وكان راى الكنيسه واقباط مصر ممثلين فى كلام القص( اكرام لمعى) رئيس مجلس الاعلام فى الكنيسه الانجيليه عندما صرح ( لم تستفد اسرائيل من اى دوله عربيه مثلما استفادت من مصر بعد اخراجنا من معادله الحرب وتوقيع اتفاقيه السلام وهذا ساهم من زياده قوه اسرائيل)

اما فى مجال السياسى والشعبى فكان راى نواب مجلس الشعب المصرى كالاتى

النائب المستقل طلعت السادات قال : يجب سحب الثقه من هذه الحكومه

النائب الاخوانى احمد البلتاجى قال : ان كلام الحكومه يوحى بانه يجب علينا تقبيل يد اسرائيل على موافقتها على استيراد الغاز من مصر

والنائب الوفدى احمد ناصر قال: احنا كده بنشجع اسرائيل علىاللى بتعمله فى فلسطين ولبنان

وده معناه ان الشعب المصرى بكل طوائفه و بكل توجهاته يحرموا و يرفضوا تصدير الغاز المصرى لاسرائيل وطبعا كالعاده الحكومه ضربت بكلامهم عرض الحائط والغاز المصرى وصل اسرائيل .تفتكروا ده معناه ايه ؟

سؤال محرج

هو ليه كل المصرين وكل رجال الدين وكل رجال السياسه بكل انتمائتهم شايفين حاجه والحكومه شايفه حاجه تانيه خالص وكلامها هو اللى بيمشى؟

تيجى تقولنا هى شايفه الموضوع ازاى او تقولنا انها نسيت المأساه اللى بيعشها الشعب الفلسطينى من سنه 1948 لحد دلوقت تقولنا ان ملايين الفلسطينين المحاصرين فى غزه ومش لاقيين اكل ولا دواء ولا نور ولا بنزين نسيت اللى حصل فى بيروت وجنوب لبنان وفى مدرسه بحر البقر فى مصر كل ده يعنى اتنسى علشان خاطر مين؟؟


بعنا خاطر اهلنا واشترينا خاطر مين ؟؟؟وياريت كان بفلوس ده ببلاش

فاكرين الدول العربيه عملت ايه معانا فى حرب اكتوبر؟ رفضوا يصدروا البترول للدول اللى بتساند اسرائيل وشاه ايران بعتلنا سفينه مليانه بترول وفى دول بعتتلنا فلوس والكل وقف جمبنا جمعناهم علشان كنا كبار ولينا كرامه

دلوقت احنا عملنا عكس اللى اتعمل معانا تماما ادينا الغازلليهود بنقولهم اقتلوا كمان وادبحوا
ياترى كده حد هيثق فينا تانى ؟ انا بسال

هو احنا كده خونه

حد يرد عليا احنا كده خونه؟ لو واحد فلسطينى او لبنانى قالى انت خاين علشان انا مصرى علشان بلدك بتصدر للدوله اللى بتدبحه غاز علشان تكمل مجازرها اقوله ايه ارد اقوله ايه؟

هحط وشى فى الارض اه وهقولها تانى (احنا كلنا وشنا فى الارض لحد ما نتخلص من الاتفاقيه السوده دى )

وانا بحزر ده هيبقى مبرر كبير لكل اصحاب الافكار المتطرفه للقيام باعمال ارهابيه هنا فى مصر .

سيناريوهات حمضانه

وهتسمع وقتها كلام كتير حمضان وتفاصيل تعبانه احنا منفهمهاش ومش عايزين نفهمها احنا اللى متاكدين منه انه عيب وحرام الكلام ده وان مفيش مبرر فى الدنيا كلها يخلينا ندى بادينا الغاز لليهود علشان يقتلونا
هتلاقى الى يقولك ده الشريك الاجنبى وملناش فيه
هتقوله وليه شريك اجنبى ومفيش ليه مصرى ؟ هيقولك امكانيتنا والنظام الراس مالى والبزنس ملوش وطن ولا دين

(و انتوا عرفين طبعا مين الى ملوش وطن ولادين ) والله عيب
واللى يقولك اصلها اتفاقيه دوليه دا كدب ودا مش كلامى دا كلام سياده السفير ابراهيم يسرى قال : الاتفاقيه ليست دوليه كما زعمت الحكومه لتتهرب من عرضها على مجلس الشعب شايف التضليل
وان كانت حتى دوليه ولا كونيه انا مالى ومال الكلام ده الغاز ده بتاعنا كلنا مش بتاع الحكومه تديه لاى حد كده وده حق اخواتنا العرب علينا
انا اللى عايز اعرفه بصراحه كده دى ضغوط على الحكومه ولا حب فى اليهود

انا واثق انها مش حب فى اليهود المصرى مهما كان مش خاين
بس هى اكيد ضغوط وعارف انها مش سهله اننا نلغيها وده هيدخلنا فى مواجهه اكيده مع اسرائيل ومن خلفها امريكا واحتمال يفرضوا علينا عقوبات واحنا متعاقبين خلقه مش ناقصه بس انا عايز اقول حاجه لحكومتنا

( يا حكومتنا ارمى حمولك علينا وكلنا وراكى ومعاكى) عايزين يفرضوا عقوبات عادى مستحملين لاننا رجاله وغلطنا والراجل لما بيغلط بيتحمل نتيجه غلطه سعتها الواحد مننا حتى لو مش ياكل هيدفع عمره فدى اى وزير فى حكومتنا0جربونا بس انتوا وهتلاقونا معاكوا الشعب مش ضدكوا احنا ضد اسرائيل ضد اى حد يحاول يسرقنا ولا احنا داخلين على تطبيع ولا ايه؟

لن ننسى

انا كده قولت الى عندى بس عايز افتكر معاكوا موقفين نوصلهم لحكومتنا
الاول لما النجم المحبوب محمد ابو تريكه فى غانا قلع فانله المنتخب لتظهر تحتها فانله مكتوب عليها ( تعاطفا مع غزه) انا من رايى الفانله دى مكانها مش فى غانا مكانها امام مجلس الوزراء فى مصر مش فى غانا

الموقف التانى لما حدث الاجتياح الفسطينى لمعبر رفح مئات الالاف من الفلسطنين دخلوا رفح المصريه انا شوفت على الشاشه راجل فلسطينى بيجرى واشترى كرتونه شبسى شيفين اى حاجه اى حاجه باى سعر كيلوا السكر اللى بيتباع ب3 جنيه اتباع لهم ب25 جنيه ومقلوش لا. اشتروا لانهم مش لاقين مش لاقين دواء ولا اكل ولا شرب ياريت الموقف ده يرقق قلبنا عليهم شويه. سلام

كلمتين ( إلى مصر )
كلمات : أحمد فؤاد نجم
غناء : الشيخ إمام
............................
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين

الى المدون فتحى فريد صاحب مدونه المجنون الى كاتب عن نفسه انه ناشط فى مجال حقوق الانسان الى مهموم اوى بمشاكل الاقباط فى مصر ومحسسنا ديما ان الاقباط فى مصر معذبين ومطحونين وشويه وهيقول بيدفعوا الجزيه
يا عم فريد انا معاك ان للاقباط فى مصر مشاكل كثيرة وانه يجب الا يكون هناك فرق بي اى مسلم ومسيحى فى مصر بس انت ناسى ان المسلمين بيعانوا برده من نفس المشاكل دى ولا انت مش واخد بالك ان اى مسلم ملتحى هتلاقيه عامل اشتراك ابونيه فى كل معتقلات البلد ( بيتاخد جوه يطلع عين اهله ) ودايما فى الصف الاخير فى التعيين والترقيات حتى الطلبة فى المدينة الجامعية برده فى الصف الاخير والى يقول عنه انه ارهابى ومتطرف كان واجب عليك لما تتكلم عن مشاكل الاقباط تتكلم عنها بطريقة متتحسسناش ان المسلمين فى نفس الوقت عايشين فى الجزء الاخر من المدينة الى مليان عز وخير والحياه معاهم زبادى فى الخلاط وكمان اى مسيحى هيقرا كلامك ده هيحس ان اخوه المسلم هو الى عامل فيه كدة كان لازم تعرفه ان زى ما فيه مشاكل عندهم فيه مشاكر برده عند المسلمين والحكاية مش حكاية مسلم او مسيحى الكل فى الهم متساوى باختصار فكر فى مشاكل مصر كلها وحتى لو حصل ظلم لاى مسيحى فى مصر على يد ظابط شرطة مثلا متقعدش تولول وتقول اضطهاد للمسيحين لا الظابط ده نفسه هو الى بيعزب ويضرب ويحط العصايه فى مؤخره المسم ومقلناش وقتها ان ده اضطها دينى وبرده مقلناش ان كل ظباط الشرطة كدة انا بسالك لمصلحة مين الى بتعمله ده ؟ لمصلحة مصر ؟ اشك
انا مش عارف انت فعلا تقصد كدة ولا خانك حمناسك انا بحييك انك بتفكر فى هموم اخوانك الاقباط مش عيب ده واجب على مسلم انه يفكر فى اخوه الميحى وانه المسيحى يفكر فى مصلحه اخوه المسلم بس خليك معتدل فى طريقة طرحك للموضوع .
بس الى انا عايز اغهمه ولا يمكن اسامحك فيه انك ذكرت فى احد مقالاتك قبل كدة ان كان ليك واحد صحبك مسلم واتنصر وانك رحت هنيته لما عمل كدة لالالالالالالالالالالا ( دى مش حرية ولا دى علمانية زى ما انت عايز لأ دى قلة دين وقلة ادب وعدم احترام لمشاعر المسلميين الى المفرود انك منهم ) انا مش بقول اقتل الى يعمل كدة بس متهنيهوش وكأنه عمل عمل بطولى بغض النظر عن حسابه فى الاخرى واننا نعامله ازاى فى الدنيا بس خليك فاهم انه كافر ومرتد فى حد يهنى حد على كفره ؟
انا لو لقيت مسيحى اسلم وواحد صاحبه مسيحى راح يهنيه على اسلامه هقوله متسلم انت كمان بالمرة ولو رفض هقول عليه معندوش ملة ومنافق ومش هحترمه انما الطبيعى انه يحزن اه ميوصلهاش لحد العنف بس حقه انه يحزن ده دينه برده دانت يا جدع حتى مسالتوش ليه عمل كدة ورحت هنيته على طول وكانك كت مستنى الحكاية دى من زمان .
يا مجنون انت مصر مش محتاجة مجانيين مصر عايزة شجعان بيحبوها وانت شجاع وبتحب مصر بس خليك عارف ان مصر مسلمين واقباط مش مسلمين بس ولا اقباط بس وان المسلمين والاقباط فى الهوى سوى .
انت عارف ليه المعارضة فى مصر اغلبها فقدت مصداقيتها ؟ علشان بيعملو زى الى بتعمله ده انا اول ما قريت كلامك حبيتك واحترمتك بس بعد كدة لقيتك بتخرف فى مواضيع مينفعش تخرف فيها وحد الله كدة واهدى وفكر شوية سلام

محدش فاهم حاجة


فى الفتره الاخيره كثرت الاصوات الى بتطالب بالتغير اخوان مسلمين وكفايه وحزب الغد و كثير من المدونين الكل بينادى للتغير وهنا تظهر مشكله كبيره وهى ان المواطن المصرى البسيط فى الشارع كل الشاغله حاليا لقمه العيش والاسعار وده طبيعى منطلبش احنا من اى انسان انه يشغل نفسه باى شئ اخر قبل ما يطمئن للقمه عيشه بس الى ظاهر ايضا ان الكثير مننا لايعلم معنى كلمه ( التغير ) مش عارفين تغير ايه الحكومه يعنى ولا سياده الرئيس ولا البلد ولا ايه؟ وحتى لو عرفوا معنى الكلمه مش عارفين ليه اصلا نغير ونغير نروح لمين؟

الحكومه والمعارضه فى وادى والشعب فى وادى تانى
قليل من الناس الى بيحاولوا يعرفوا ويفهموا ايه الى بيحصل حوليهم تجد البعد منهم مؤيد ل ( ايمن نور )
لمجرد بس انه ضد الحكومه ومعارض للحزب الوطنى واعتقل واتعذب فى السجون والغالبيه العظمى من الى بيقولوا كده ميعرفوش الراجل ده ايه فكره وبيقول ايه وعايز ايه اصلا وقليل منهم الحضر له مؤتمر وسمع كلامه ,
اما النعارضين له بقولوا عليه ( خاين ) ليه علشان امريكا بتساعدوا وكونداليزا رايس بتسال عنه ( ياااااه بقى خاين لمجرد ان كونداليزا رايس بتسال عليه ) .

وتجد البعض الاخر متعصب جدا للاخوان المسلمين ويرى ان الاخوان دول هما المسلمين الحقيقين وان المتمسك بالاخوان كالقابض على دينه وان الاخوان كثير ما عذبوا وشردوا وماتوا فى سبيل الوطن وقدموا العشرات من الشهداء فى حرب فلسطين واكتوبر ( يا سلام كده بيجبوا علينا يعنى ولا هما مش مصرين ولا ايه ما فى مصرين كتير استشهدوا مسلمين ومسحين حزب وطنى واخوان ووفد دى مصر ملهاش دعوه بالاحزاب الحكايه دى )
لكن الى انا متاكد منه ان اغلب الشباب المنضم لجماعه الاخوان ملهمش اى دور فى الجماعه غير انهم وقت اى مسيره لمرشح اخوانى تلاقيهم فى مقدمه المسيره شيلين سيوف زى اطفال كورال الاوبرا ,
سؤال اتمنى ان شباب الاخوان يجاوبونى عليه لو اى شاب منهم رايح يصوت فى الانتخابات ووقد امامه ولنفرض مثلا مرشح اخوانى ( حرامى , مرتشى باختصار لا يصلح لهذا المنصب و يعلم ذلك جيدا ) وفى المقابل اى مرشح اخر جدير بهذا المنصب هيرشح مين ؟ الاصلح ولا مرشح الاخوان ؟
لا بلاش ك مرشح الاخوان وانى اتسأل هل هذا لملحه مصر ولا الاخوان ؟ اتمنى الاجابه .

وبالتاكيد اعرف شباب كتيييييييير منضم للحزب الوطنى وده لعده اسباب
الاول : او اتمسكت فى اى كمين طلع كرنيه الحزب احسن من البطاقه القوميه
ثانيا : الحزب بيطلع معسكرات ورحلات لشرم الشيخ ببلاش
ثالثا : لو اترشحت فى اى انتخابات وانت تبع الحزب هتكسب بدايتا من انتخابات اتحاد الطلاب الى انتخابات مجلس الشعب ( وبصراحه كده مفيش حاجه اسمها انتخابات اتحاد طلاب ده اختيار بالكوسه لاى شاب منضم برده للحزب الوطنى)

اما بتوع كفايه دول انا مش فاهمهم بصراحه كل الى طالع عليهم تغير تغير تغير ياعم محدش فاهم حاجه برده نغير
كله معاه كمامته مكتوب عليه كفايه وخلاص طيب فهمونى حاجه مفيش العندهم كفايه كفايه وبس .

عايز تبقى بطل خليك قليل الأدب
بس بصفه عامه بقى اى حد يشتم فى الحزب الوطنى او الحكومه او سياده الريس على اساس او لا بقى بطل وطبعا الامن المصر ميتوصاش اليكلم يتفسح على طول حتى انا ممكن اتفسح مع انى معملتش اى حاجه خارج نظام الدوله الى المفروض انه ديمقراتى بس هو كده وخلاص وبالشكل ده بيخلقوا منى ومن غيرى ابطال على الفاضى .

اما الغالبيه العظمى من الشعب ملهومش دعوه بالسياسه ولا حتى مين الوزراء فى حكومه بلده وميعرفوش ومش عايزين يعرفوا ايه ابسط حقوقهم عايزين يمشوا جمب الحيط وخلاص مفيش شغل عادى الكل كده , فيه شغل خير وبركه واحمد ربنا على اى مرتب بقى تاخده .
بس ده م وجهه نظرى مش موضوع رضا واستحمال لا ده ناتج من انهم اصلا مش مستوعبين ان فى مشكله ومش فاهمين الفرق الكبير بين اوضاعهم واوضاع الشعوب فى الدول الاخرى ومش عرفين ايه امكانيات مصر اصلا وهل فى توزيع عادل للثوره ولا لأ .
والمتامل فى ما حدث فى الانتخابات البرلمانيه عام 2005 من تزوير اصوات الناخبين وده مش كلامى ده باعتراف اغلب القضاه المشرفين على اللجان الانتخابيه وان الاخوان المسلمين فازوا فى اغلب الدوائر الى تقدموا فيها وحصلوا على مجموع اصوات لايقل عن 1.6 مليون صوت انتخابى ( وده من وجهه نظرى مش حبا فى الاخوان لا ده كرها فى الحزب الوطنى ).
مع ربط هذه الحداث بما حدث فى انتخابات الرئاسه بعدها وكيف ان سياده الرئيس مش بس فاز لا ده اكتسح ومن غير تزوير وده مين الفاز ده سياده الرئيس زعيم الحزب الوطنى وصاحب الكلمه الاول والاخيره فيه .وترددت كلمه كتير جدا على مسامع الكل ( الى نعرفه احسن من المنعرفوش ) فعلا الشعب مش عارف حاجه بس من وقتها واكتشفت حاجه ده مش عيب فينا احنا بس لا دى سياسه سياسه بتمارس علينا علشان نفضل مش عرفين حاجه كده ده الانا حاسس بيه لو غلط عرفونى
سياسه اللا وعى سياسه التشتيت

سياسه خلتنا معندناش فكره مؤكده عن اى حاجه وخلتنا معندناش ثقه فى اى حد طيب لو حبينا بقى نغير نغير لمين ونغير ليه اصلا ما احنا مش حاسين ان فى مشكله اصلا طيب ولو غيرنا من غير وعى سياسى كده غيرنا عن جهل ده فى حد ذاته خطر جدا التغير من اجل التغير مش صح هنبقى زى الى لسه خارج من قصة حب مجروح وعلشان يداوى جرحه بسرعه هيندفع ويدخل فى اول قصة اخرى تقابله ممكن جدا الشخص الى يختاره يبقى مش مناسب ويجرحه تانى ووقتها الجرح هيبقى اعمق علشان كدة الناس كانت بتقول ( الى نعرفه احسن من الى منعرفهوش ) طيب هو احنا نعرف اى حركة او حزب فى مصر نتجمع حوله لالالالالالالالالا مقيش حزب جدير بكدة مع العلم ان الحكومة برده مش عايزنها وانا كمان مش عايزها والحزب اخطاء كتيره وواضحه
ناس تقولك ان( الحزب الى ميعرفش الناس بيه ميستحقش حبهم ولا هيبقى حزيب ناجح ) واللهى فى الجون الكلمة دى بس فيه سؤال تفتكروا الاحزاب الى مش بتوصل للناس ده بارادتها ولا فى حاجة بتمنعهم من انهم يوصلولهم !!؟

طيب بلاش احزاب ولا حركات خلينا فى الافراد فى حد فى مصر نثق فيه 90 % بس بعد سياده الريس . حاليا لا طبعا اى معارض يظهر وتبتدى الناس تحبه . تتجمع حوله يوصف بالتعامل مع جهات اجنبية وانه خاين وانه بيمول من الخارج وكثير بيتلفقله تهمه ويتفسح ومش بس الى بتحاربه الحكومه لا المعارضين كمان بيحاربوا بعض
ومفيش فى مصر اى زعامة دينية نثق فيهم بداية من شيخ الازهر والمفتى الى بنقول عليهم انهم تبع الحكومة وملهمش اى لازمة لحد اى شيخ تانى يبتدى يظهر والشباب يحبه يا اما يتقال عليه انه بيفتى او متعصب ويمنع من الدعوة فى المساجد او تحدد اقامته او يطرد بره مصر وساعات كثير بيشرف فى احسن معتقل فيكى يا مصر وبينى وبينكم بجد مبقاش عندنا ثقة فى حد حتى الاعلام دايما بيحاول يوصلنا صورة المتدين الملتحى انه دايما متطرف وارهابى وواضح للجميع ان الاخوان المسلمين والسلفيين كارهين بعض وبيتريقوا على بعض ده يقول للتانى انت عايز الحكم والثانى يرد وانت دافن نفسك ودافنا معاك فى الصلاه والطهار واتباع اولو الامر بس وخلى البلد تضرب تقلب حوالينا واحنا ملناش دعوة يا جماعة هنلاقيها من مين ولا من مين ولا شيوخ الازهر الى الحياه عندهم عنب العنب ولا فيه اى حاجة يبقى فيه اضراب او مظاهرات فى البلد ودول فى الجوامع بيتكلموا عن بر الوالدين وعمرة رمضان بس اكثر حاجة حيرتنى لما قريت حديث عن سيدنا محمد صلى الله عليه وسلم ( الإسلام دين ودنيا ) صدق رسول الله صلى الله عليه وسلم
انا كنت فاكر ان ده كلام الاخوان طلع ان طلبة الازهر وشريعة وقانون بيدرسوه وان الايمان بهذا الحديث وعدمه هو احد قضايا الايمان والكفر فى العقيدة ( يا نهار اسود يعنى الحكومة تعلم الكلام ده للناس وتقول ان الاسلام هو المصدر الاول للتشريع وبعد كدة الى تلاقيه ملتحى تزعل منه طاب ازاى ) !!!!؟
انا اعرف ان فى البلد دى المهندس ممكن يشتغل محاسب وخريج الاداب يفتح صيدلية وظابط الشرطة ملك على الارض وديكتاتور لو حب والدكتور مش لاقى شغل وان لقى يقبض 100 جنيه ميكفيهوش حتى يروح بيته عاااااااااااااادى دى مصر برده واحنا متعودين على كدة بس ان تعلمونا حاجة وتحاربونا فيها بعد كدة يبقة انتو كدة عايزنا نتلخبط

طبعا دلوقتى محدش فاهم انا عايز ايه بالظبط ولا انا تبع وين اقسم بالله انا نفسى مش فاهم حاجة انا بس شايف اننا لازم نتثقف ونعرف اوضاع البلد ونحاول يبقى عندنا شخصية وراى يا جماعه الجهل ضعف احنا معنداش ثقة فى احد ولا حتى فى نفسنا ولا عارفين فين المشكلة وطبعا مش عارفين الحل بالشكل ده هيبقى الوضع على ماهو عليه لمليون سنة قدام .
يا جماعه مينفعش نبقى فى وادى والحكومة والمعارضة فى وادى تانى خالص يلا نحاول
نقرا عن الحزب الوطنى وننضم له بس لو اقتنعنا بافكاره
ونقرا عن الاخوان وعن كفايه والغد والوفد نقرا عن كل دول اكيد وقتها لو بنحب مصر كلنا على اختلاف توجهاتنا هنتجمه فى نقطه واحدة وهنفهم فين الغلط وهمحاول نصححه كلنا علشان مصر وطنا كلنا