هنا دسوووق...!!!!!!!!!!!!!!!!!!!!!!
ده اللي اقدر أوصف بيه اللي شرفناه في دسوق ولمده أسبوع قبل الموعد المقرر لاعاده الانتخابات البرلمانية في دائرة دسوق يوم الاتنين
13/ 7/ 2008 عشرات العشرات من عربات الامن المركزى يتقدمها المدرعات واخدلى بالك انت مدرعات يانهار اسود وامن مركزى بالهبل كتير جدا امال مين اللى على الجبهه ؟ على راى الزعيم عادل امام
ده فى اهنى بلد الكلام ده بيحصل ليه يعنى هو مرشح تنظيم القاعده داخل ولا ايه ولا طالبان فتحت فرع فى البلد ولا حكومتنا قررت تتبع اسلوب امريكا فى مكافحه الارهاب
الامن المصرى فى الشوارع خوفا من مرشح تنظيف القاعده المصرى
المهم بعد تلت سنين قعدت فيهم دسوق من غير نائب اخيرا رضوا عن البلد دى وقرروا يعيدوا اللعبه بس بقوانين جديده
قوانين اللعبه الجديده
القانون الاول : مفيش اشراف قضائى اذا كان بيبقى فى تزوير وفى اشراف امال لما يلغوه ايه اللى هيحصل ؟ على النعمه ده احتمال بعد كده ندخل اللجنه نلاقيهم لغوا التصويت بالبطاقه الانتخابيه او حتى البطاقه الشخصيه بتاعه مصر ويقولوا التصويت بكارنيه الحزب الوطنى بس مرشح الاخوان حاول يعمل مسيره الامن حسره وهاتك يا ضرب وجرى وطعفشه فى الناس وخدين بالكوا من كلمه طعفشه دى هى غريبه شويه بس والله كلمه موحيه جدا باللى حصل
وطبعا عارفين ليه عملوا كده خلاص بقى مش عايزين حاجه توجع دماغهم ولا شويه مستشارين يتكلموا زى الدوره الفاتت ولا بتاع خلاص بقى وكان الحكومه بتقولنا ابنى يبقى على كتفى وادور عليه
القانون التانى : ده بقى قانون بدعه مشكله من مشاكل الزمن ميجيش على دماغ ابليس ذات نفسه حاجه جديده مسمعناش عنها قبل كده
قال ايه مفيش حملات انتخابيه للمرشحين واى اعلانات تكون فى سريه تامه واللى يخالف الكلام ده هيرد عليه بحزم وشده
يعنى سوكوتم بوكوتم كل مرشح يمسك كل ناخب كده على جمب فى الخباسه بصوت واطى ويوشوشه ويكفى على الخبر مجور شوف والنبى ده كلام ده
المزهقنى ان كل ده بقى عينى عينك كده ومحدش يقدر يتكلم خلاص مبقاش حتى فى احترام لعقلتا ولا بقى فى اى شك اننا نقدر نعمل حاجه خلاص دبحولنا القطه وهيعدوا كده يدبحوها لاى واحد يفكر انه يتهبل ويعمل حاجه .
سر المكالمه إللى دارت بين مرشح الاخوان وظابط المباحث
ظابط المباحث قال : مفيش مسيرات والاعلانات تكون سريه
مرشح الاخوان رد : ليه هى كانت انتخبات اتحاد طلاب
ظابط المباحث قال : والله انا جايلى تعليمات بكده واللى يخالف الكلام ده جايلى تعليمات انى استعمل معاه القوه
مرشح الإخوان قال : طيب لو حبيت انسحب
ظابط المباحث رد : براحتك بس متطلعش اى بيانات ولو طلعت اللى هنشوفه بيوزع اى بيان هيتاخد
وعلى فكره هتشرف عندنا شويه بعد الانتخابات
وهنا انتهت المكالمه اللى الله اعلم صح ولا خطا بس الكلام ده عرفته من ابن المرشح وعلى مسؤليته
الوضع
الناخب اولا بما ان الانتخابات سريه مش هيعرف معاد الانتخابات ومحدش يطلع يصوت ويبقوا كده منهم فى بعضيهم زيتهم فى دقيقهم على راى المثل واللى هيعرف المعاد ويجى يطلع لما يشوف شكل عربيات الامن المركزى هيعد ويرجع تانى واللى مش هيخاف ويروح برده اللجنه مش هيلاقى اصلا لجنه وهو ده بقى الفكر الجديد او مش هيعرف يدخل وهو ده اللى حصل اللجان اللى مش على مزاجهم تتقفل وده حصل ولجان اتقفلت الساعه 9 الصبح فتحت سعتين وقفلت و وفى لجان منع الناس من الدخول فيها وفى بعض اللجان الساعه 8 الصبح بعد ما فتحت بساعه الصناديق اتملت مع ان محدش طلع من البلد اصلا وده مش كلامى انا واهل الدايره بس ده كلام مرشح الاخوان نفسه لوكاله رويترز الى قالت الكلام ده فى تقريرها والى احلى من كده انهم صادروا عربيات نص نقل كتير علشان باين كده يشيلوا عليها الصناديق وبعضها كان بيبقى عليها كام وحش كده محدش عارف ده شرطه ولا بلطجى دايرين فى البلد الى ليشكوا فيه معرفش بق يشكوا فيه انه ايه بالظبط بس المهم اللى ميعجبهمش وخلاص ينزلوا يروقوه ويطلعوا وطبعا العربيات دى بتاعه ناس غلابه شغالين عليها خدوها منهم عافيه ببلاش او باجور رمزيه كالعاده ومش هاممهم البيوت المقفوله والا الشغل الواقف ولا الناس الغلابه دى تاكل منين والناس بقى تبقى تروح تستلم عربياتها بعد ما التمسليه تخلص
شايفين يا رجاله الانتخابات فى بلدنا بقت خراب الخراب وطبعا فاز فى الاخر الاتنين مرشحين الوطنى الفئات والعمال والفلاحين
طارق ابراهيم سليم
43607
احمد عبدة عليبة
42199
رجب البنا
860
دى مثلا جزئ من نتايج الانتخابات الاولانى ده اللوا طارق مرشح الحزب الوطنى فئات الكان اعاده ابل كده مع الاخير مرشح الاخوان فئات وسبحان الله بعد التزوير وكله فى دوره 2005كان مرشح الوطنى حاصل على 21 الف صوت دلوقت بقدره قادر مكملش الف صوت والله حكم واللى فى النص ده مرشح الوطنى عمال وفلاحين كان ساقط من اول جوله فى دوره 2005 وااه ربنا كرمه المره دى ونجح لانه عرف فى الفتره دى يبقى مرشح الوطنى ايه رايكوا بقى
طيب هو انا عايز اعرف هو النائب عن الديره دى لو كان اى مرشح مستقل او حتى اخوانى او اى حزب تانى غير الوطنى ده دليل ان الناس كرهت الوطنى وده هيضر الحزب او ده اللى هيخلى الاخوان اغلبيه يعنى ؟ لا طبعا طيب ايه لزمتها بقى نعمل حركات نص كم زى دى ملهاش اى لزمه والمجلس كده كده خلص الدوره دى حركه زى دى هتخلى المش كاره الحزب الوطنى يكرهه واللى مش كاره الحكومه يكرهها يجماعه هو انتوا حتى مبقاش عندكوا وقت تضحكوا علينا وتسبكوها كويس ياعم اجرحنى لكن براحه على راى سعيد ( واحد صاحبى عادى يعنى)
سؤال لولبى
بعد كل اللى حصل ده عارفين فين المشكله ؟ المشكله فى اجابه السؤال ده وده بقى سؤال لولبى بجد
السؤال بيقول : لو اى حد فينا عايز يرشح نفسه لمجلس الشعب وهو مش حزب وطنى و نفسه يخدم الناس بعد الشافه ده هيخوض الانتخابات ؟
هل هيبقى عنده ثقه انه هينجح وهو مش تبع الحزب ؟
طيب لو انتى مواطن عادى مش هتخاف انك تطلع تصوت فى فى الانتخابات يحصلك اى حاجه طيب بلاش تخاف على نفسك مش هتخاف على ولادك ومراتك حد يعتقلهم ولا يضربهم ولا يغتصبهم بجد ده بيحصل انا كلامى ممكن تحس انه مبالغ فيه بس لا دى مش مبالغه الكلام اه بسيط بس مش سطحى يا جماعه بجد انا سمعت كتير بيقولوا واحنا مالنا احنا احنا مش اد اللى هيحصلنا ودول اذا اخوان ولا حزب وطنى ولا غيروا مش هناخد منهم حاجه وهنتاخد ومحدش هيسال علينا
وبصراحه كلامهم صح دول لما بيعتقلوا حد من المعارضين دول وبزات الاخوان والله ما بيحصلهم حاجه احسن اكل واحسن شرب وحياه اخر دلع جوه هو اه سجن بس يومين وبيعدوا ,وبتوع الوطنى ملوك محدش بيدوس لهم على طرف , انما المواطن العادى على النعمه لو اتمسك ممكن يغتصبوه
تخيلوا كده انا اطلع امارس حقى الطبيعى فى التصويت واختيار النائب بتاعى ارجع لابويا وابنى على كتفى يبقى ليا اسمين محمود الحجار وحاتم رشيد ينهار اسود طيب اقول لابويا ايه اقوله انت السبب اللى سبتنى اخرج كده ومعرفتنيش اللى فيها انت اللى سبت ادريس يلعب معايا لا يا عم كده بلاش منها احسن
اجابه السؤال اللولبى
كل الفات ده يوصلنا لاجابه واحده هى لا بمعنى ان الناس معندهاش ثقه فى نزاهه الانتخابات واللى هينجح هو مرشح الوطنى مهما حصل وده وده معناه ان الحياه النيابيه فى مصر والمشاركه من جانب الشعب خلاص بالسلامه مفيش والامل عندهم هيموت وى ما انتوا عرفين مفيش امل يبقى مفيش اراده لاى حاجه يبقى مفيش اى تقدم مفيش اى اى حاجه غير حياه زى حياه الجاهليه احنا داخلين عليها وده بالفعل اللى حصل فى دايره دسوق مرشح بتاع الاخوان متفهموش كلامى غلط لما بتكلم كتير على الاخوان انى اخوانى ولا حاجه بس هما دول اكبر معارضه فى مصر وكمان اصلا بقيت المرشحين كانوا برضوا حزب وطنى والحزب مجبهومش يعنى برضوا لما ينجحوا مثلا يعنى هيبقوا وطنى ودول متعتبرهمش معارضه
المهم مرشح الاخوان هو بيمر على اللجان الساعه 8 الصبح يعنى بعد ما اتفتحت بساعه لقى الصناديق مليانه طيب ازاى؟
وكمان التوكيلات اللى المفروض بيديها المرشح لنائب عنه فى كل لجنه اتلعب فيها وكانت توكيلات الاخوان يا بتتقطع يا بتبقى مضروبه بمعنى ان التوكيل مع مرشح الوطنى واى مرشح تانى عامل نفسه مش وطنى بيبقى فيه تحت ختم وتوقيع المامور انما توكيلات الاخوان ختم بس يجوا يدخلوا بيها اللجان يترفضوا
ده التوكيل الخاص بمرشح الاخوان .... وده اترفض....ليه ؟ 
وده التوكيل الخاص بمرشح الحزب الوطنى اللى طبعا اتقبل ودخل حامله اللجنه ليه؟
اقولك انا ليه شايفين التوكيلين كويس ما علينا من البيانات المكتوبه فيه هو اه انا شطبها علشان اصحابها طلبوا منى كده بس انا اقصد بالتحديد بص على تحت امضه مامور المركز هتلاقيها موجوده عند مرشح الوطنى ومش هى العند مرشح الاخوان حاجه تانيه مش امضة المامور وكانوا بقى بتلككوا فى الحته دى وطبعا مفيش مامور بقى هيمضيلك تانى يرحوله يقولهم لا وتلاقى الف سبب والف حجه تانيه يعنى اختلفت الاسباب والرفض واحد
ده بقى الامر اللى جعل مرشح الاخوان يجمع رجالته ويطلع علىمسجد سيدى ابراهيم الدسوقى فى الميدان امامه ويعلن انسحابه من الانتخابات هو طبعا مش انت انسحاب رسمى بس اهى حركه يوصل فيها انه خلاص فقد الامل فى انتخابات نزيهه
دى صوره مرشح الاخوان وهو بيعلن انسحابه اعتراضا على عدم نزاهه الانتخابات
هو فيه ايه ؟
هو احنا ليه بقينا كده احنا بقى ملناش قيمه ولا اعتبار وبقى الظلم والتذوير عينى عينك ومحدش حتى بيخبى علينا وبيحاول يظهر بمظهر كويس ادامنا خلاص بقوا مشين بمقوله اخبط دماغك فى الحيط واعلى ما فى خيلك اركبه احنا خلاص مبقاش عندنا ثقه فى الحكومه ولا حتى المعارضه الحكومه كمان مبقاش عندها ثقه فينا اننا لسه عندنا كرامه او نخوه او ممكن نعمل حاجه وكله بيقول يلا نفسى وعلشان كده من الاخر هما خلاص ركبونا ودلدلو رجلهم ايوه محدش يزعل من الكلمه احنا اتركبنا يا جماعه
احنا اتركبنا يا رجاله
وبما انى مش خبره ومش محلل سياسى وكلامى كلام الناس فى الشارع كلام شوارع يعنى وبما انى بحب مصر اوى زى اى مصرى دلوقت بيحب البلد بس مش ناوى يعمل حاجه بس برضه ضميرى بيانبنى وكاره نفسى انى مش عارف اعمل حاجه اصلى هعمل ايه يعنى هطلع مظاهره ولا اعمل اضراب وايه يعنى واخرتها ايه الحكومه ودن من طين وودن من عجين وياريت على اد كده هيخدونى وادخل جوه وانا مش حمل قفا من الاخر يعنى سعتها بقى الله اعلم هطلع شكلى ايه يا اما هطلع متطرف واعمل اى اعمال ارهابيه ومجرم واروح اضرب مين واقتل مين وده طبعا مش حل خالص بس هى طريقه الامن اللى بيتعامل بيها فى الحالات دى هى اللى بتخلق مجرمين او هطلع كاره البلد وكاره نفسى ومهما حصل فيها مش هيهمنى تانى خلاص لحد ما ربك يعدلها ويجى الفرج من عنده ووقت بقى ما نعمل كلنا كده يبقى سعتها نستاهل اللى يحصل لنا
بس فى حاجه هقولهالكم اكيد اى مسلم مامن بيها لانها كلام ربنا واى مسيحى برضه اكيد مش هيختلف على معنى الايه دى
بسم الله الرحمن الرحيم ( لايغير الله ما بقوم حتى يغيروا ما بانفسهم ) صدق الله العظيم يعنى نحاول نعمل حاجه بادينا ومنخفش ربنا هيبقى معانا حتى لو قدرتنا متسمحش نحاول واكيد بدل ربنا معانا هنوصل طيب بزمتكوا احنا خايفين على ايه ما كده ميتين وكده ميتين
اى حاجه نتظاهر ننتحر نعيط نعمل اضراب اى عن الانتخابات بلاش عن العمل ولا اقولكوا بلاش عن العمل دى الحكايه مش ناقصه اصلا هو يعنى الانتاج والفلوس فى البلد مقطعين نفسهم نعمل اى حاجه نوصلهم فيها اعتراضنا نرفض الاعتراف النائب اللى مفروض علينا اى حاجه لا العنف طبعا انا مش عندى الحل بس اكيد لو كلنا اتفقنا وادينا فى ايد بعض هنلاقى الحل ومنخفش من حاجه يا جماعه الحكومه مخلتلناش حاجه نبكى عليها
يا كده بقى يا بم انى فى كليه هندسه وابويا معاه قرشين انا ابص لحالى بقى واشتغل وادور لى على وحده حلوه اجوزها او اشوفلى عقد عمل واسافر بره وخلى البلد تضرب تخرب وانا مالى بقى واعد ادعلها من بره وانتواكمان يلا كل واحد معندوش فى البلد دى ضهر ولا وسطه يخلص نفسه وهج على بره باى طريقه بقى عقد عمل , يركب مركب ويغرق فى البحر , يتكوم فى رجل طياره ويقع يموت منها اى حاجه ما كده ميت وكده ميت مش فارقه بس بلاش يعدى من على الحدود اصل الامن عندنا مبيرحمش على الحدود الضرب هناك فى المليان وميفرقش معاهم رجاله ولا حريم ولا اطفال ولا اقول لكوا عدوا حتى لو متنا نبقى شهدا
اذا الشعب يوما اراد الحياه................................. فلابد ان يجيب عقد عمل
والى هيعرف يوصل بره هو اه هيذل برده ويطلع عين امه فى الشغل بس هيعيش وبرده نعد كلنا ندعى لمصر من بره ويا سلام بقى لو نعمل حركه المزلولون فى الخارج من بره ونطال بالتغير من بره البلد ويستضفونا عبر القمر الصناعى فى البرامج عندنا فى القناه الاولى ويقولوا علينا خونه وبنستعين بالناس فى الخارج وتطلع علينا اشعات بقى ينهاااااااااااااار اسود ده كده بيظه وكده بيظه ايه الهجص ده مش عارف بقى خلاص بلاش حكايه المزلولون دى احنا نعيش بقى فى حالنا وخلاص
وفى النهايه هقول كلمتين
هانيئا للشعب بالحكومه............................................................ وهانيئا للحكومه بالشعب
هناك تعليق واحد:
انت تعرضت لنقطه مهمه جدا تحدث دوما فى اى انتخابات تحدث داخل جمهوريه مصر العربيه...وها انت قد دعمت كلامك بالوثائق ولكن هل من مستجيب؟
إرسال تعليق